ကိုဂျူးရဲ.မှတ်ချက်

  ဒါလဲကိုဂျူရဲ.ကွန်မန်.လေးပါ။agree to disagree ပေါ.ခင်ဗျာ။သူ.အကြိုက်ကိုယ်.အကြိုက်ဆို
တာလည်းရှိသေးတာကိုး။ကျွန်တော်ကတော.မည်သည်.ပါတီဝင်မှလည်းမဟုတ်ပါ။စာဖတ်ဝါသနာ
သက်သက်သာရှိသူ။မှန်၏မမှန်၏ကတော.ဖတ်သူသာဆုံးဖြတ်ရန်သာ။

ခုတလော နအဖ သတင်းစာတွေ ဘလော့တွေမှာ NLDက ၁၉၉၀ရွေးကောက်ပွဲရလဒ်ကို စွန့််လွှတ်ပြီး နအဖစိတ်ကြိုက် ၂၀၁၀ခုနှစ်မှာ နောက်တစ်ခါရွေးကောက်ပွဲထပ်ဝင်ပြိုင်ဘို့ ဘေးတီးပေါ်လစီဆောင်းပါးတွေ တော်တော်များများနေရာယူလာပါတယ်။ မိတ်ဆွေကြီး ကိုပိတောက်ကလဲ အားကျမခံရေးပါတယ်။ ဘာ Compromise မှမပါဘဲ နအဖ လုပ်ခွင့်ပေးထားတဲ့ဘောင်ထဲကဘဲ NLDက တဘက်သတ် အလျှော့ပေးပူးပေါင်းဖို့။
NLDခမျာလဲ နအဖနဲ့ လက်တွဲအလုပ်ဖြစ်ချင်လွန်းလို့ ခြေသလုံးမဖက်ရုံတမယ် အလျှော့ပေးကမ်းလှမ်းနေတာပါဗျာ။ နောက်ဆုံး သူတို့ကို နည်းမှန်လမ်းမှန်လွှတ်တော်ခေါ်ပေးရင် အစိုးရမဖွဲ့ပါဘူး၊ နအဖကိုအာဏာပြန်အပ်ပါ့မယ်၊ ဒါမှမဟုတ်အခြေခံဥပဒေပြန်လည်သုံးသပ်ရေး လုပ်ငန်းလေးကို အတူလက်တွဲ လုပ်ကြရအောင်ပါ၊ နအဖအာဏာယူထားပါ၊ နအဖကဘဲ ရွေးကောက်ပွဲလုပ်ပေးပါ ဆိုတဲ့အထိဘဲ။

နအဖက ဘာမှပြန်မပြောသေးဘူး ကိုပိတောက်က NLDကမ်းလှမ်းချက်တွေဟာ ၁၉၉၀ရလဒ်ကိုအခြေခံလို့ တစ်ခုမှအလုပ်မဖြစ်နိုင်ဘူး၊ စိတ်ကူးရင်မှုသက်သက်သာဖြစ်တယ်ဆိုပြီးပယ်ချလိုက်ပါတယ်။ နအဖဆွဲတဲ့အခြေခံဥပဒေဟာ နအဖအသာစီးယူထားတာတွေ များတာမှန်ပေမဲ့ ဒီမိုကရေစီ ဘက်သား ပါတီတွေအတွက် လှုပ်သာရှားသာရှိပါတယ်၊ မြန်မာ့နိုင်ငံရေး ရှေ့တစ်လှမ်းတက်ဖို့ဆိုရင် ဒီအခြေခံဥပဒေဘောင်ထဲက လုပ်ဖို့ဆိုတာလက်တွေ့ အကျဆုံးနဲ့အဖြစ်နိုင်ဆုံးနည်းလမ်းပဲဖြစ်ပါတယ်ဆိုပြီး နအဖအခြေခံဥပဒေကိုအကောင်းမြင်ဘက်က ဇောင်းပေးရေးသား သွား ပါတယ်။

မှန်ပါတယ်၊ ကိုပိတောက်ပြောသွားတာတွေကတော့ ချောလို့ဘဲ၊ ဒါပေမဲ့ ဒီနေရာမှာ မေးစရာမေးခွန်းတွေရှိနေတယ် -

(၁) အစိုးရက NLD ကို ၁၉၉၀ရွေးကောက်ပွဲနိုင်တဲ့ရလဒ်ကို စွန့််လွှတ်ပါလို့သာပြောနေတယ် ဘာကြောင့်စွန့်လွှတ်ရမှာလဲ၊ ဘာအတွက်စွန့်လွှတ် ရမှာလဲ၊ တရားသဖြင့် reason မပေးနိုင်ဘူး။

(၂) ရလဒ်ကို စွန့်လွှတ်ပေးလိုက်ရင် မြန်မာနိုင်ငံမှာ အစိုးရတစ်ခုဟာ ရွေးကောက်ပွဲလုပ်ပြီး ကိုယ်မကြိုက်သူနိုင်တဲ့အခါ အကြောင်းအမျိုးမျိုးပြ အသိအမှတ်မပြု၊ အာဏာမလွှဲဘဲနေတာ မှန်တယ်လို့လက်ခံလိုက်သလိုဖြစ်မနေဘူးလား။ မဟုတ်တာလုပ်ထားပြီး ပီပီပြင်ပြင်နဲ့ နာနာညစ်ရင် မြန်မာတွေ မခံနိုင်ပါဘူး၊ ဒူးထောက်ကြရတာပါဘဲလို့ နောင်လာနောင်သားတွေအတွက် တလွဲသင်ခန်းစာပေးခဲ့သလိုများ ဖြစ်မနေဘူးလား? တိုင်းပြည်အတွက်ရှေ့ရေးမကောင်းဘူး။

(၃) နအဖအစိုးရအပေါ်ယုံကြည်မှုကဘယ်လောက်ရှိသင့်လဲ။ ယခင်ပြောခဲ့တာတွေ၊ လုပ်ရပ်တွေအရဒီမိုကရေစီစနစ်ကိုဦးတည်တဲ့ အပြောင်းအလဲတွေမလုပ်ချင်လို့ ၁၉၉၀ရလဒ်ကိုအသိအမှတ်မပြုဘဲ အခြေခံဥပဒေဆွဲပြီးရွေးကောက်ပွဲနောက်တစ်ခါထပ်လုပ်တာဆိုတော့ သူ့ဆီက ဒီမိုကရေစီနဲ့လူ့အခွင့်အရေးတွေ ရလာလိမ့်မယ်လို့ စိတ်ချယုံကြည်မျှော်လင့်ပြီး ပုံအပ်သင့်သလား။ ဘယ်သူတာဝန်ယူနိုင်လဲ၊ စောင့်မကြည့်သင့်ဘူးလား? တကယ်တန်း မရရင်ဘယ်လိုလုပ်မလဲ?

ဒီမေးခွန်းသုံးခုကိုဖြေကြည့်တော့ (၁) ၁၉၉၀ရွေးကောက်ပွဲကို NLDနိုင်သွားလို့ အသိအမှတ်မပြုတာ၊ အာဏာမလွှဲတာဖြစ်တယ်၊ နောက်ထပ်နိုင်ရင်လည်း အသိအမှတ်ပြုမှာမဟုတ်လို့ ၀င်မပြိုင်သင့်ဘူး (၂) နောင်လာနောင်သားတွေ အတွက် တလွဲသင်ခန်းစာဖြစ်စေတယ်၊ မြန်မာလူမျိုးတွေ သိက္ခာကျလှတယ်၊ လက်မခံသင့်ဘူး။ (၃) လုံးလုံးလျှားလျှားမယုံသင့်ဘူး၊ စောင့်ကြည့်သင့်တယ် ဆိုတဲ့ အဖြေဘဲ ရတယ်။

ဒါကြောင့် -
၁၉၉၀ရလဒ်ကို စွန့်လွှတ်ပြီး ၂၀၁၀ရွေးကောက်ပွဲကို NLDပါတီက အသိအမှတ်ပြု ၀င်မပြိုင်သင့်ဘူး၊ အစိုးရသက်တမ်းတစ်ခုလောက်တော့ အနဲဆုံး စောင့်ကြည့်သင့်တယ်။ (ဆရာနေ၀င်းမောင်က NLDဟာ ၂၀၁၀မှာ တစ်ဝက်ဘဲဝင်ပြိုင်ပြီး အာဏာမမက်မောဘူးဆိုတာ ပြသင့်တယ် လို့ပြောခဲ့တယ်၊ ကျွန်တော်ကတော့ လုံးလုံးဝင်မပြိုင်တာနဲ့ ပြတာ ပိုကောင်းမယ်ထင်တယ်။)

အသိအမှတ်မပြုခြင်းဖြင့် ရလာမဲ့အကျိုးးဆက်တွေက - ရွေးကောက်ပွဲအပြီးမှာ နအဖအတွက် ဒီမိုကရေစီစနစ်ကိုဖေါ်ဆောင်ဘို့ တာဝန်ပိုကြီးမယ်၊ တိုင်းပြည်အဘက်ဘက်ကကောင်းအောင်ကျိုးစားဖို့ တွန်းအားဖြစ်လာမယ်၊ မြန်မာလူမျိုးတွေ မဟုတ်မတရားအလုပ်မခံဘူး၊ ခံနိုင်ရည်ရှိတယ်ဆိုတာ ကမ္ဘာကိုပြနိုင်မယ်။ နောင်လာနောင်သားတွေအတွက် စံပြနမူနာကောင်းဖြစ်မယ်။ ကိုပိတောက်တို့ပြောသလို ၂၀၁၀ရွေးကောက်ပွဲပြီးရင် ဒီမိုကရေစီပါတီတွေ လှုပ်ရှားလို့ ရမယ်မရဘူးဆိုတာ ဘယ်သူမှတာဝန်မယူနိုင်ဘူး၊ ဒါကြောင့် အသိအမှတ်ပြုဘို့ မလောဘဲ စောင့်ကြည့်တာမှန်တယ်။ ဒီ option ကို NLD ကိုင်ထား ရမယ်။ အခုငြင်းနေမဲ့အစား နအဖက တိုင်းပြည်ရဲ့ဒီမိုကရေစီစနစ် တိုးတက်ရာတိုးတက်ကြောင်းကို ဖေါ်ဆောင်နိုင်ပြီဆိုရင်၊ လူ့အခွင့်အရေးတွေလေးစားလိုက်နာလာပြီဆိုရင် အချိန်မရွေးအသိအမှတ်ပြု ပူးပေါင်းလို့ရပါတယ်။ နအဖကိုညစ်ထားတာမဟုတ်ဘူး။ နအဖကို စိတ်ကောင်းစေတနာကောင်းနဲ့ အရည်အခြင်းပြဘို့အခွင့်အရေး ပေးထားတာ။

ဖြစ်နိုင်တဲ့ အကျိုးမဲ့က - NLDကို ဖျက်သိမ်းခံရနိုင်တယ် ဆိုတာတစ်ခုဘဲရှိတယ်။ ဘာမှမလျော့ပါးပါဘူး။ ခုလည်း ဘာလှုပ်ရှားနေရလို့လဲ။ နောက်ပြီး၁၉၈၉ကထဲက ဥပဒေအရမှတ်ပုံတင်ထားတဲ့ တရားဝင်နိုင်ငံရေးပါတီဟာ ရွေးကောက်ပွဲ မ၀င်ရုံနဲ့တော့ အလိုလိုပျက်မသွားဘူး ထင်တယ်။ တခြားနိုင်ငံကနိုင်ငံရေးပါတီတွေလည်း ရွေးကောက်ပွဲကိုသပိတ်မှောက်တာ ခဏခဏ ကြားဘူးပါတယ်။ ရွေးကောက်ပွဲဝင်တဲ့ အခါဝင်မယ် မ၀င်နိုင်ရင်မ၀င်ဘဲနေမယ်၊ သူ့သဘော၊ မ၀င်လို့ ပါတီပျက်မသွားဘူးထင်တယ်။ အစိုးရက တမင်ဖျက်မှပျက်မယ်။
ကိုင်း-နောက်ဆုံး အဆိုးဆုံးဖြစ်တဲ့ အစိုးရကညစ်ပတ်ပြီပါတီးဖျက်ခံရလဲ NLDဆိုတာ ဦးစူးစမ်းပြောသလိုဆို နာမည်ဘဲ၊ Decoration ဘဲ။ မရှိလို့ဘာမှမဖြစ်ပါဘူး။ ကမ္ဘာသိမြန်မာသိပုဂ္ဂိုလ်တွေမို့ တသီးပုဂ္ဂလအဖြစ်လည်းဝင်ပြိုင်နိုင်တာဘဲ။ လိုအပ်ရင်ပါတီအသစ်ထပ်ထောင်လဲ ရတာဘဲ။ နာမည်ရှိပြီးသားမို့ မြန်မာပြည်နိုင်ငံရေးမှာသူတို့ ဘေးရောက်မသွားနိုင်ပါဘူး၊ လုပ်နိုင်တဲ့ alternative တွေအများကြီးလို့ ပြောချင်တာပါ။ လုပ်တာမလုပ်တာတော့ မသိပါ။ ဒီအကွက်တွေကို NLDလဲမြင်မှာပါ။
သေချာပါတယ် နအဖက Compromise မလုပ်ဘဲနဲ့တော့ NLDက နောက်တစ်ခါရွေးကောက်ပွဲ ၀င်မပြိုင်ပါဘူး။ ဘေးတီးပေါ်လစီဆောင်းပါးတွေ ရေးနေရင် မောရုံဘဲရှိမယ်။

ကိုပိတောက်ကနောက်နေပြန်ပါပြီ၊ ပါတီစုံရွေးကောက်ပွဲပါဆိုမှ အစိုးရဆန့်ကျင်သူရော ထောက်ခံသူပါ ရွေးကောက်ပွဲမှာ ပါဝင်ခွင့်ပေးမယ် ဆိုတာအဆန်းလုပ်ပြောနေတယ်။ ပါတီစုံဒီမိုကရေစီစနစ်မှာ ဒီအခွင့်အရေးမပေးလို့ ဘာပေးရမှာလဲ။ ဒီလောက်တော့သိမယ်ထင်တာ။
၈၈တုံးက မဆလပါတီက ဒေါက်တာမောင်မောင်ပေးတဲ့ အခွင့်အရေးမယူမိလို့ နှစ်တွေဒီလောက်ကြာကုန်ရတယ်လို့ ကိုပိတောက်ကပြောချင် တယ်လား၊ ၁၉၉၀မှာ ဒီကနေ့လိုဘဲ တပ်မတော်ဦးစီးချုပ်ကလုပ်ပေးတဲ့ရွေးကောက်ပွဲမို့ ယုံယုံကြည်ကြည်ဝင်ခဲ့ကြပါသဗျား။ ကိတ်မုန့်တစ်တုံး စားဘူးခဲ့ပြီလေ၊ အခုဟာကနောက်တစ်တုံးစားဘို့ ဆရာတို့ကဘေးတီးနေတာ။ ဒေါက်တာမောင်မောင်လို အရပ်သားက လုပ်သွားတယ်ဆို ကြားကောင်းပါသေးတယ်။

ကိုပိတောက်ပြောသလို တိုင်းပြည်မှာ ဒီမိုကရေစီပါတီတွေ လှုပ်ရှားနေပြီ၊ ဒိမိုကရေစီအခွင့်အရေးတွေ ရသင့်သလောက်ရနေပြီဆိုလဲ ဒေါ်စုနဲ့ NLDကို ကျွန်တော်တို့ မလိုတော့ဘူး၊ မေံလိုက်တော့၊ သူတို့ကို ရာဇ၀င်ထဲမှာ ထားခဲ့ကြစို့ပေါ့။

စေတနာဖြင့်၊
ကိုဂျူး